दशैंँ मान्न उखु किसानलाई ९५ करोड अनुदान !

६ असोज, काठमाडौं । सरकारले उखु किसानलाई अनुदानबापतको रकम पठाएको छ । तराईका ८ जिल्लाका किसानलाई वितरण गर्न ९५ करोड २० लाख ५० हजार रुपैयाँ वितरण गर्न सम्बन्धित जिल्लामा पठाइएको कृषि मन्त्रालयले जनाएको छ ।

मन्त्रालयका प्रवक्ता डा. हरिबहादुर केसीका अनुसार किसानले दशैंमा पैसाको अभाव नझेलुन् भनेर यसपटक छिट्टै रकम जिल्लास्थित कोष तथा लेखा नियन्त्रण कार्यालय पठाइएको हो । आर्थिक वर्ष २०७६/७७ को पुसदेखि क्रसिङ भएको उखुको आधारमा मन्त्रालयलाई प्राप्त रकम पठाइएको हो ।

जिल्लामा पठाइएको रकम जिल्लास्तरीय समितिको रोहोबरमा वितरण गरिनेछ । गतवर्ष १ करोड ४८ लाख ५५ हजार ५ सय ९४ क्विन्टल उखु क्रसिङ भएको रिपोर्ट उखु मिलहरुले बुझाएका छन् । सोही रकममा केही रकम थप गर्दै मन्त्रालयले किसानलाई अनुदान दिन जिल्लामा रकम पठाएको हो ।