बर्दियाका कोरोना संक्रमितको भेरी अस्पतालमा मृत्यु

७ असोज, काठमाडौं। बर्दियाका कोरोना भाइरस संक्रमितको बाँकेको भेरी अस्पतालमा उपचारका क्रममा मृत्यु भएको छ । बारबर्दिया नगरपालिका-३ बनियाभारका ३९ वर्षका पुरुषको उपचारको क्रममा बुधबार बिहान साढे १० बजे मृत्यु भएको हो ।

मृतक स्वास्थ्यमा समस्या आएपछि भदौ २९ गते दिउँसो भेरी अस्पतालमा भर्ना भएका थिए । सोही अस्पतामा पीसीआर परीक्षण गर्दा ३० गते उनमा कोरोना पुष्टि भएको थियो ।

भेरी अस्पताल भर्ना हुनुअघि ती पुरुषले कोरोना भएको आशंकामा २८ गते पीसीआर परीक्षण गर्न राप्ती स्वास्थ्य विज्ञान प्रतिष्ठानमा स्वाब दिएका थिए । प्रतिष्ठानले उनको रिपोर्ट नेगेटिभ दिएको थियो ।

तर स्वास्थ्यमा समस्या भएपछि उनी २९ गते भेरी अस्पताल भर्ना भए । भेरीले पुनस् स्वाब परीक्षण गर्दा उनमा कोरोना संक्रमण भएको पुष्टि भएको हो ।