एसिड हान्नेलाई २० बर्ष जेल, १० लाख जरिवाना

७ असोज, काठमाडौं । अब एसिड आक्रमण गर्नेलाई २० बर्ष जेल र १० लाख जरिवाना हुने भएको छ । सरकारले तेजाव आक्रमण गर्नेहरूलाई २० वर्षसम्म जेल सजाय र १० लाखसम्म जरिवाना हुने कानुन ल्याउने तयारी गरेको हो ।

तेजाब आक्रमणबाट पीडितहरूलाई भएको क्षतिका आधारमा आक्रमणकारीलाई सजाय दिने प्रस्ताव कानुन मन्त्रालयले गरेको छ । अध्यादेश तयार भएको कानुनको मस्यौदा अब बस्ने मन्त्रिपरिषद बैठकले पारित गर्नेछ । तेजाव आक्रमणलाई नियमन गर्ने र दण्ड, सजायको गरी दुइटा अध्यादेश लैजाने कानुन मन्त्रालयको तयारी छ।

मन्त्रालयले गृह मन्त्रालय र सरोकारवाला निकायहरूसँग छलफल गरेर दुइटा अध्यादेशको मस्यौदा तयार पारेको हो। अध्यादेशमा एसिड आक्रमणबाट पूर्ण क्षति भएमा २० वर्ष सजाय र १० लाख जरिवाना प्रस्ताव गरिएको छ।

एउटा आँखा, एउटा कानमा क्षति भयो भने १० देखि २० वर्षसम्म कैद प्रस्ताव गरिएको छ भने अंगभंग हुने र शारीरिक क्षति भयो भने ५ देखि १० वर्ष कैद बस्नुपर्ने प्रावधान राखिएको छ। अध्यादेशमा तेजावको विक्री वितरणका लागि लाइसेन्स अनिवार्य गर्न प्रस्ताव गरिएको छ।