बाढीले जीप बगाउँदा चालकको मृत्यु, दुई जना बेपत्ता

७ असोज, बुटवल । कपिलवस्तुको कोइली खोलामा आएको बाढीले जीप बगाउँदा एक जनाको मृत्यु भएको छ । दुई जना बेपत्ता भएका छन् । नेपाल विद्युत प्राधिकरणको कर्मचारी सवार जीप बाढीले बगाउँदा चालक माधव पाण्डेको मृत्यु भएको हो ।

अरु २ जना भने बेपत्ता भएका छन् । जीपबाट हाम फालेर ३ जनाले ज्यान जोगाएका छन् । बाणगंगा नगरपालिकाको बनगाइ भलवाड डोहोटे सडकखण्ड अन्तर्गत कोइली खोलामा आएको बाढीले बा १ ञ १०८९ नम्बरको जिप बगाएको हो ।

जितपुरबाट पडेरियामा रहेको ट्रान्सफर्मरमा फ्युज बनाएर फर्किने क्रममा उनीहरु सवार जिप बाढीले बगाएको थियो । जीपलाई डोजर लगाएर निकालिएको छ । तर बाढीमा बेपत्ता भएकाहरुलाई भने भेट्टाउन सकिएको छैन् ।