स्याङ्जाको तमादी पहिरोमा परी ९ जनाको मृत्यु

८ असोज, स्याङ्जा । स्याङ्जाको तमादीमा पहिरोमा परेर ९ जनाको मृत्यु भएको छ । वालिङ नगरपालिका–१४ तमादीमा बिहीबार बिहान गएको पहिरोमा परी ज्यान गुमाउनेको संख्या ९ पुगेको जिल्ला प्रहरी कार्यालय स्याङ्जाले जनाएको छ । मृत्यु हुनेमा ७ महिले बालक समेत छन् ।

घरमाथिको भीरबाट आएको पहिरोमा परी बेपत्ता भएकामध्ये ९ जनाको शव फेला परेको जिल्ला प्रहरी कार्यालय स्याङ्जाका प्रवक्ता डीएसपी राजेन्द्र अधिकारीले जानकारी दिए ।

पहिरोमा परी मृत्यु हुनेमा १४ वर्षीय विक्रम नेपाली, २१ वर्षीय कुलदिप नेपाली, १६ वर्षीया विनिता नेपाली, २८ वर्षीया उमाकला नेपाली, ४८ वर्षीया माया नेपाली, ३० वर्षीय दीपक नेपाली, ६० वर्षीया सानी नेपाली र ९ वर्षीय विवश नेपाली रहेका छन् ।

पहिरोमा परी घाइतेकी भएकी १६ वर्षीया मनिषा नेपालीलाई थप उपचारका लागि पोखरा रिफर गरिएको छ । यसैगरी कालीगण्डकी गाउँपालिका–४ मा गएको पहिरोमा परी १६ वर्षीय विष्णु परियारको पनि ज्यान गएको प्रहरीले जनाएको छ ।