भुवन केसीसँगको लफडापछि झनै महंगी साम्राज्ञी !

८ असोज, काठमाडौं । सदावहार नायक भूवन केसीसँगको लफडापछि नायिका साम्राज्ञी राज्यलक्ष्मी शाह नेपाली चलचित्रबाट पाखा लाग्ने धेरैको अनुमान थियो । उनले ठूलो हिम्मतका साथ भुवनविरुद्धको आक्रोश पोखेकी थिइन् ।

धेरै नेपाली नायिकाले भोगेको तर भन्न नसकेको यौन दुव्र्यवहारको विषय साम्राज्ञीले उठाएकी थिइन् । जसको पक्षमा धेरै चलचित्रकर्मीले हातमा हात थापे । तर केहीले विरोध पनि गरे । र पनि साम्राज्ञी डराईनन् ।

यस्तै वाद र विवादका बेला साम्राज्ञीको व्यवस्ततामा कुनै फरक आएको छैन् । उनी झन अहिले नयाँ नयाँ फिल्म साइन गरिरहेकी छिन् । सोमबार ‘रेड वाइन’ नामक चलचित्र साइन गर्दै उनले यसको पुष्टि गरेकी छिन् ।

यो चलचित्रमा १५ लाख बढी पारिश्रमिक साम्राज्ञीले बुझेको चर्चा छ । उनले पहिले पनि १५ लाखभन्दा कम मूल्यमा फिल्म नखेल्ने अडान लिएकी थिइन् । मनिष राउत, नायिका आना शर्मा समेत रहने फिल्ममा उनी प्रमुख भूमिकामा रहने गरी फिल्ममा साइन गरेकी हुन् ।

नायिका शाहलाई चलचित्र ‘हुतुतु’का लागि पनि अफर गरिएको चर्चा चलचित्र बजारमा छ । गतबर्ष साम्राज्ञी अभिनित २ चलचित्र ‘मारुनी र रातो टिका निधारमा’ रिलिज भए ।

दुबै चलचित्र बक्स अफिसमा पछारिदा साम्राज्ञीको क्रेज कमजोर बनेको टिप्पणी भयो । यसअघि खेलेका फिल्ममा पनि उनले चर्को पारिश्रमिक लिएकी थिइन् । कूनै बेला यस्तै क्रेज रेखा थापाको थियो । अहिले नायिका साम्राज्ञीको क्रेज छ ।