महालक्ष्मीका मेयरलाई दोस्रोपटक कोरोना

९ असोज, काठमाडौं । ललितपुरको महालक्ष्मी नगरपालिकाका मेयर रामेश्वर श्रेष्ठलाई दोस्रोपटक कोरोना संक्रमण पुष्टि भएको छ । कोरोना संक्रमितको सम्पर्कमा पुगेपछि परीक्षण गर्दा मेयर श्रेष्ठ र उनकी पत्नीलाई समेत दोस्रोपटक कोरोना संक्रमण पुष्टि भएको हो । उनीहरु दुवैको ग्वार्कोस्थित किष्ट मेडिकल कलेजमा उपचार भइरहेको छ ।

यसअघि गएको महिना मेयर श्रेष्ठलाई कोरोना संक्रमण पुष्टि भएको थियो । दुई हप्ता आइसोलेसनमा बसेर घर फर्किएका उनलाई फेरि कोरोना देखिएपछि अस्पतालमै भर्ना भएका छन् ।

यस्तै गोदावरी नगरपालिकाका प्रमुख गजेन्द्र महर्जन र उनकी धर्मपत्नी गङ्गामायालाई कोरोना सङ्क्रमण पुष्टि भएको छ । असोज ६ गते उनीहरुले  स्वाब सङ्कलन गरेर राष्ट्रिय जनस्वास्थ्य प्रयोगशाला टेकु परीक्षणका लागि पठाउँदा आज कोरोना सङ्क्रमण पुष्टि भएको हो ।

हाल महर्जन दम्पती होम आइसोलेसनमा रहेको र गाह्रो भयो भने मात्र अस्पताल जाने निर्णय गरिएको प्रमुख महर्जनले बताए । शुक्रबार नै ललितपुर महानगरपालिकाका मेयर चिरीबाबु महर्जनलाई पनि कोरोना संक्रमण पुष्टि भएको थियो ।