राक्षसी बाबु : जसले १० बर्षदेखि आमाकै अगाडी छोरीलाई बलात्कार गरिरहे !

१२ असोज, धादिङ । एक राक्षसी स्वभावका बाबुले १० बर्षदेखि आफ्नै छोरीलाई बलात्कार गरेको पाइएको छ । धादिङको त्रिपुरासुन्दरी गाउँपालिकामा एक ३५ वर्षीय बाबुले १० बर्षदेखि आफ्नै छोरीलाई बलात्कार गरिरहेको पाइएको हो ।

धेरैपटक बाबुले आमाकै अगाडी छोरीलाई बलात्कार गरेको पनि प्रहरीको भनाई छ । ५ बर्षको उमेरदेखि नै छोरीलाई यौन दुव्र्यवहार शुरु गरेका उनले १४ बर्षको उमेरसम्म बलात्कार गरिरहेको पीडित किशोरीले बताएकी छिन् ।

घटना पटक–पटक भएको र आफ्नो आमाले घटना थाहा पाउँदासमेत आफूले न्याय नपाएपछि घर छाडेर भागेको बालिकाले बताएकी छिन् । आरोपित बाबुले आफूलाई पाँच वर्षको उमेरदेखि नै बलात्कार गर्दै आएकाले छिमेकीको घरमा काम गर्ने एक जनासँग भागेर काठमाडौँ जान लाग्दा पीडित बालिकाको उद्वार गरिएको थियो ।

प्रहरीले बाबुलाई पक्राउ गरेर थप अनुसन्धान शुरु गरेको छ भने छोरीलाई एक संस्थाको आवास गृहमा राखिएको छ ।