काठमाडौंकाे करुणा अस्पतालमा पर्साका स्वास्थ्यकर्मीको मृत्यु

१२ असोज, काठमाडौं । नेपालमा सोमबार कोरोना भाइरसबाट एक स्वास्थ्यकर्मीको मृत्यु भएको छ। पर्साको जगरनाथपुर गाउँपालिकाको स्वास्थ्य शाखामा कार्यरत सीअहेब रामसिकिल प्रसाद साहको उपचारको क्रममा काठमाडौंस्थित करुणा अस्पतालमा मृत्यु भएको हो ।

५८ वर्षीय साहलाई ज्वरो, रुघा र खोकी देखिएको थियो। त्यसपछि उनले जनकपुर पुगेर उपचार सुरु गरेका थिए। स्थानीय अस्पतालमा उपचार गराउँने क्रममा झन् स्वास्थ्य विग्रिदै गएपछि उनलाई काठमाडौंको शिक्षण अस्पताल रिफर गरिएको थियो।

उनलाई अस्पतालको आइसियुमा बेड नभएपछि करुणा अस्पताल पुर्‍याइएको थियो। त्यहाँ पुगेपछि कोरोना जाँच गर्दा उनमा पोजिटिभ देखिएको थियो। केही दिनपछि स्वास्थ्य बिग्रिएर भेन्टिलेटरमा पुगेका उनको सोमबार बिहान मृत्यु भएको हो । मृतक साहको स्थायी ठेगाना महोत्तरी जिल्लाको मनरा नगरपालिका ७ हो।