सहकारीको करोडौं ठगीका दोषी अग्रवाल नक्कली नम्बर प्लेटका गाडीसहित पक्राउ

१२ असोज, काठमाडौं । सहकारीमा जम्मा भएको सर्वसाधारणको करोडौं रुपैयाँ ठगी गरी विगत २ वर्षदेखि फरार रहेका न्यूरोडस्थित एयरटेल सहकारी संस्थाका एक पदाधिकारीलाई प्रहरी वृत्त, कालीमाटीले नक्कली नम्बर प्लेटसहितका दुई सवारी साधनसहित पक्राउ गरेको छ ।

प्रहरीले नक्कली नम्बर प्लेट राखेर अवैद्य धन्दा गरिरहेको आशंकामा पक्राउ परेका सुरेन्द्रकुमार अग्रवाललाई आजै यातायात व्यवस्था कार्यालयमा उपस्थित गराएको जनाएको छ । सक्कली नम्बरका गाडीमा नक्कली नम्बर प्लेट राख्नुको कारण बारे प्रहरीले थप अनुसन्धान गरिरहेको जनाएको छ ।

यहीबीच, न्यूरोडमा रहेको एयरटेल सहकारी संस्थामा पदाधिकारी तथा सञ्चालक मिलेर सर्वसाधारण बचतकर्ताको बिसौं करोड ठगी गरेको आरोपमा यतिबेला उक्त सहकारीका तत्कालीन प्रवन्ध निर्देशक अशोक गोयलसहितका केही पक्राउ परी कारागारमा बन्दी जीवन बिताइरहेका छन् भने आधा दर्जन बढी अझै पनि फरार रहेका छन् ।

महानगरीय प्रहरी परिसर, काठमाडौंको पक्राउ सूचीमा रहेर फरार रहँदै आएका अग्रवाल आज दुई वटा नक्कली नम्बर प्लेटका सवारी साधन प्रयोग गर्दै आएको अवस्थामा पक्राउ परेपछि प्रहरीले उक्त प्रकरण बारे समेत अनुसन्धन गर्दैछ भने सहकारी ठगीका सन्दर्भमा पनि मुद्दा प्रकृया अघि बढाउने तयारी गरेको जनाएको छ ।