युवतीको बलात्कारपछि विभत्स हत्या, शरीर खोलामा फालेर टाउको गायब !

१३ असोज, काठमाडौं । भक्तपुरको हनुमन्ते खोलामा बलात्कारपछि विभत्स रुपमा हत्या गरेर टाउको बिनाको शव भेटिएको छ । युवतीका संवेदनशिल अंगलाई क्षतविक्षत पारेर शव खोलाको किनारमा फालेको अवस्थामा गएको चैत तेस्रो हप्ता भेटिएको हो ।

तर प्रहरीले अहिलेसम्म पनि अभियुक्त पक्राउ गर्न सकेको छैन् । अभियुक्त पक्राउ त परको कुरा, त्यो शव कुन युवतीको हो ? र कसरी हत्या भयो भन्ने विषयमा पनि प्रहरीको अनुसन्धान रुमल्लिएको छ ।

खोला छेउमा फालिएको शवको टाउको छैन् । संवेदनशिल अंग पुरै क्षतविक्षत भएकाले बलात्कारपछि हत्या भएको देखिएको छ । घटनालाई लुकाउन टाउको काटेर अन्तै कतै फालिएको अनुमान छ । तर अहिलेसम्म फेला परेको छैन् ।

अनुमानित १९ बर्षकी युवती कसरी बलात्कृत भइन् भन्ने खुलेको छैन् । उनीमाथि सामूहिक बलात्कार भएको हुन सक्ने र आफू जोगिन सबै मिलेर हत्या गरेको हुन सक्ने अनुमान छ । शवबाटै पनि प्रमाण नष्ट गर्न यौनांग क्षतविक्षत गरेको हुन सक्ने अर्को अनुमान छ ।

चैतदेखि असोजसम्म अनुसन्धान जारी रहेको भनिएपनि अहिलेसम्म यसबारे विस्तृतमा खोज्न प्रहरीले सकेको छैन् । शव भेटिएको ठाउँ वरपरका विभिन्न मानिसहरुलाई सोधीखोजी गरिएपनि शवको पहिचान हुन नसकेको प्रहरीको भनाई छ । जिल्ला प्रहरी कार्यालय भक्तपुर र महानगरी अपराध महाशाखा टेकुको टोलीले संयुक्त रुपमा अनुसन्धान गरिरहेका छन् ।