ब्रोइलर कुखुरालाई रंग लगाएर लोकल भन्दै १५० रुपैयाँमा बिक्री !

१३ असोज, काठमाडौं । ब्रोइलर कुखुराको चल्लालाई रंग लगाएर बेच्ने डरलाग्दो धन्दा काठमाडौंमा फस्टाएको छ । लोकल भनेर ब्रोइलर कुखुराका चल्लालाई रंग लगाएर बेच्ने ४ जनालाई प्रहरीले पक्राउ गरेपछि यस्ताे रहस्य बाहिरिएकाे हाे ।

महानगरीय प्रहरी वृत्त, कालिमाटीले ब्रोइलर कुखुराका चल्लालाई रंग लगाएर लोकल भन्दै डेढ सय रुपैयाँमा बेच्ने चार जनालाई पक्राउ गरेर अनुसन्धान शुरु गरेको छ । पक्राउ पर्नेमा प्रेमशिला देवी, वकिल खान, सुमित्रा जैसवाल र चन्दादेवी साह छन् । उनीहरुको ठेगाना भने खुलाइएको छैन् ।

उनीहरुले १० रुपैयाँ प्रतिगोटामा ब्रोइलर कुखुराका चल्ला किनेर लोकल भन्दै डेढ सय रुपैयाँसम्ममा बिक्री गर्ने गरेका थिए । गोप्य सुचनाका आधारमा छापा मार्दा ३ हजार ६ सय ५० वटा चल्ला रंग लगाइएको अवस्थामा बरामद भएका प्रहरीले जनाएको छ ।

चितवनबाट ब्रोइलर कुखुराका चल्ला ल्याएर कालिमाटीमा लंग लगाएर बेच्ने गरिएको पनि प्रहरीको अनुसन्धानबाट खुलेको छ । थप २४ हजार ९ सय ५० वटा चल्लालाई रंग लगाएर बेच्ने तयारी उनीहरुको थियो । यसबारे थप अनुसन्धान भइरहेको प्रहरीको भनाई छ ।