वामदेवको सुनुवाई शुक्रबारसम्म सारियो

१४ असोज, काठमाडौं । सत्तारुढ नेकपाका उपाध्यक्ष वामदेव गौतमको सुनुवाई शुक्रबारसम्मका लागि सारिएको छ । सांसद तथा मन्त्री नबनाउन माग गर्दै सर्वोच्चमा परेको रिटमाथिको सुनुवाई शुक्रबारसम्मलाई सारिएको हो ।

बुधबार सर्वोच्च अदालतको संवैधानिक इजलासको पूर्ण इजलासमा दुवै तर्फबाट बहस भएको थियो । रिट निवेदक र विपक्षी दुबैपक्षबाट बहस भए पनि अझै कानुन व्यवसायीहरुले बहस गर्ने क्रम नसकिएका कारण सुनुवाई दुई दिन पछि अर्थात शुक्रबारसम्मलाई सारिएको हो ।

चुनाव हारेका वामदेवलाई राष्ट्रियसभा सदस्य बनाउने सरकारको निर्णय कार्यान्वयन नगराउन माग गर्दै वरिष्ठ अधिवक्ता दिनेश त्रिपाठी र अधिवक्ता बद्रीराज भट्टले सर्वोच्चमा रिट निवेदन दर्ता गराएका थिए ।

बुधबार प्रधानन्यायाधीश चोलेन्द्रशम्शेर जबरा, न्यायाधीशहरु दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडाको पूर्ण इजलासमा रिट निवेदकका तर्फबाट वरिष्ठ अधिवक्ता बद्रीबहादुर कार्की, दिनेश त्रिपाठी, हरि उप्रेती, पंकज कर्णलगायतले बहस गरेका थिए । विपक्षी सरकारी पक्षबाट महान्यायाधिवक्ता अग्नि खरेलले बहस गरेका थिए ।

उक्त रिटमाथि यसअघि असोज ७ गते न्यायाधीश आनन्दमोहन भट्टराईको इजलासले बामदेवको पद यथास्थितिमा राख्न र उनलाई थप संवैधानिक जिम्मेवारी नदिन अन्तरिम आदेश जारी गरेको थियो ।

यसले वामदेवको मन्त्री बन्ने योजनामा धक्का लागेको छ । हारेको व्यक्तिलाई चुनावमा सांसद बनाएको भन्दै सरकारको पनि आलोचना भइरहेको छ ।