अब बलात्कारका घटनामा प्रहरीलाई पनि कारवाही हुन सक्ने

१४ असोज, काठमाडौं । अब बलात्कार मुद्दामा मेलमिलाप गर्ने प्रहरीलाई पनि कारवाही हुने देखिएको छ । संसदीय समितिले बलात्कार मुद्दाका घटना मिलाउनेलाई कारवाही गर्न निर्देशन दिएपछि मुद्दा चलाउनुको साटो मेलमिलाप गर्न बाध्य पार्ने प्रहरीलाई समेत कारवाही हुने देखिएको हो ।

संसदको राज्य व्यवस्था तथा सुशासन समितिले बलात्कारका घटनामा मेलमिलाप गराउनेलाई कारबाही गर्न सरकारलाई निर्देशन दिएपछि अब प्रहरीलाई कारवाही गर्न सक्ने सम्भावना छ ।

वुधबार बझाङकी सम्झना कामीलगायत विभिन्न जिल्लामा भएका बलात्कारका घटनाको बारेमा गृहमन्त्री रामबहादुर थापा र प्रहरी महानिरीक्षक शैलेश थापा क्षत्रीसँग छलफल गरेपछि समितिले यस्तो निर्देशन दिएको हो । मेलमिलापमा सलंग्न हुने र प्रहरीकै रोहवरमा मेलमिलाप हुने घटनामा अब स्वंयम प्रहरबिाट लुक्ने सम्भावना कम छ ।

‘बलात्कारको घटनामा मेलमिलाप गराउने र त्यसको मध्यस्तकर्ताको भूमिका खेल्ने जो कोहीलाई उक्त घटनाको मतियारको रुपमा कारवाही गर्ने’ समितिले दिएको निर्देशनमा उल्लेख छ । प्राय प्रहरी अधिकारी पनि राजनीतिक संरक्षण वा दबाबका कारण पीडक र पीडित पक्षलाई मिल्न दबाब दिने गरेका छन ।

बझाङ, सप्तरी, बारा, कैलाली, बर्दिया, धनुषा, कञ्चनपुरलगायतका जिल्लामा भएका बलत्कारका घटनामा संलग्न जो कोहीलाई हदैसम्मको कानुनी सजाय र पीडितलाई न्यायसहितको उचित क्षतिपूर्ति दिने व्यवस्था मिलाउन समितिले सरकारलाई निर्देशन दिएको छ ।