सरकारविरुद्ध आन्दोलन गर्ने कांग्रेसको निर्णय, संसदको विशेष अधिवेशन बोलाउन माग

१४ असोज, काठमाडौं । नेपाली कांग्रेसले संसदको विशेष अधिवेशन आह्वान गर्न माग गरेको छ । पार्टी सभापति शेरबहादुर देउवा निवासमा बुधबार बसेको केन्द्रीय पदाधिकारीको बैठकले तत्कालै विशेष अधिवेशन आह्वान गर्न सरकारसँग माग गर्ने निर्णय गरेको हो ।

यसका लागि दबावमूलक कार्यक्रम गर्ने पनि कांग्रेसको निर्णय छ । कोरोना महामारी नियन्त्रणका लागि सरकारले प्रभावकारी काम गर्न नसकेको, देशमा भ्रष्टाचार व्यापक बन्दै गएको भन्दै कांग्रेसले यी विषयमा संसदमा छलफल गर्न विशेष अधिवेशन बोलाउनुपर्ने माग गरेको हो ।

साथै कोरोना रोकथाम र नियन्त्रणको काम प्रभावकारी रुपमा गर्न नसकेको र देशमा व्यापक भ्रष्टाचार बढेको भन्दै त्यस विषयमा सशक्त आवाज उठाउनका लागि संसदको बैठक आवश्यक पर्ने र दबाब दिएर भएपनि विशेष अधिवेशन आह्वान गर्ने निर्णय कांग्रेसले गरेको हो ।

बढ्दो भ्रष्टाचार तथा बेथिति बढेको अवस्थामा पनि सरकार मौन रहेको, नागरिकको बेरोजगारीको समस्या समाधानका लागि सरकारले ध्यान दिन नसकेको कांग्रेसको भनाइ छ । साथै कांग्रेसले सरकारविरुद्धमा सडक र संसदबाट एकसाथ संघर्ष गर्ने निर्णय पनि गरेको छ ।