नेपालमा कोरोना मृत्तकको संख्या ५०० पुग्यो

१४ असोज, काठमाडौं । नेपालमा कोरोना मृत्तकको संख्या ५०० पुगेको छ । पछिल्लो २४ घण्टामा अर्थात बुधबार १२ जनाको मृत्यु भएपछि कोरोनाबाट मृत्यु हुनेको संख्या ५०० पुगेको हो ।

बुधबार काठमाडौं र रुपन्देहीका तीन तीन जना, सुनसरीका दुई, मोरङ, सप्तरी, कपिलवस्तु र बाँकेका एक एक जनाको मृत्यु भएको हो । यससँगै कोरोना संक्रमणबाट मृत्यु हुनेको संख्या बुधबार ५०० नाघेको स्वास्थ्य तथा जनसंख्या मन्त्रालयले जनाएको छ ।

बुधबार १५ सय ५९ जना कोरोना संक्रमित थपिएका थिए । पछिल्लो २४ घन्टामा १५ सय ५९ जनामा कोरोना संक्रमण पुष्टि भएको हो । संक्रमितमध्ये काठमाडौं उपत्यकामा मात्रै ९०२ जना छन् ।

यससँगै नेपालमा कोरोना संक्रमितको संख्या ७७ हजार ८ सय १७ पुगेको छ । नेपालमा कोरोनामुक्त हुनेको संख्या ५६ हजार ४ सय २८ जना पुगेको छ । पछिल्लो समय कोरोना संक्रमितसँगै मृत्तकको संख्या पनि बढ्दै गएको छ ।