युवराज खतिवडालाई अमेरिकाको राजदूत बनाउने सरकारको निर्णय

१५ असोज, काठमाडौं । सरकारले अमेरिकाका लागि नेपाली राजदूतमा युवराज खतिवडालाई नियुक्त गर्ने निर्णय गरेको छ । आज बसेको मन्त्रिपरिषद बैठकले पूर्वअर्थमन्त्रीसमेत रहेका खतिवडालाई अमेरिकाका लागि नेपाली राजदूतमा नियुक्त गर्ने निर्णय गरेको हो ।

सरकारले राजदूतमा नियुक्त गर्ने निर्णयको सिफारिस गरेपछि राष्ट्रपतिले नियुक्त गर्ने संवैधानिक व्यवस्था छ । प्रधानमन्त्रीका विशेष आर्थिक सल्लाहकार समेत रहेका खतिवडा हालै अर्थमन्त्रीबाट पदमुक्त भएका थिए ।

राष्ट्र बैंकका पूर्वगभर्नर, राष्ट्रिय योजना आयोगका उपाध्यक्ष समेत रहेका खतिवडा राजदूत समेत बन्ने भाग्यमानी हुन् । ओलीको रोजाईमा रहेका खतिवडाबाट वैदेशिक लगानी नेपाल भित्र्याउनका लागि उनलाई महत्वपूर्ण पदमा प्रधानमन्त्रीले नियुक्त गर्दै गएका छन् ।

यस्तै लोकदर्शन रेग्मीलाई बेलायतका लागि राजदूत नियुक्त गर्ने निर्णय सरकारले गरेको छ । आजैमात्र मुख्यसचिवबाट राजीनामा दिएका रेग्मीलाई सरकारले बेलायतका लागि नेपाली राजदूतमा नियुक्त गरेको हो ।

मुख्यसचिवमा भने परराष्ट्र मन्त्रालयका सचिव शंकरदास बैरागीलाई नियुक्त गरिएको छ । रेग्मीले राजीनामा दिएलगत्तै सरकारले बैरागीलाई मुख्यसचिवमा नियुक्त गरेको हो ।