भोलि नेकपाको सचिवालय बैठक बोलाउने ओली प्रचण्डको निर्णय

१६ असोज, काठमाडौं । सत्तारुढ नेकपाको सचिवालय बैठक भोलि बस्ने भएको छ । प्रधानमन्त्री केपी शर्मा ओलीले एकलौटी रुपमा राजदुत र मुख्यसचिव नियुक्त गरेपछि तरंगित राजनीतिका बारेमा छलफल गर्न भोलि दिउँसो ४ बजे नेकपाको सचिवालय बैठक बोलाइएको हो ।

प्रधानमन्त्री तथा नेकपाका अध्यक्ष केपी शर्मा ओली र कार्यकारी अध्यक्ष पुष्पकमल दाहाल प्रचण्डबीच शुक्रबार बालुवाटारमा बसेको बैठकले भोलि सचिवालय बोलाउने निर्णय गरेको हो । बैठकमा मन्त्रिपरिषद पुनर्गठन, राजनीति नियुक्ती लगायतका विषयमा छलफल हुनेछ ।

राजदूत र मुख्य सचिव नियुक्तिमा प्रचण्डले असहमति जनाएकाले नेकपाको विवाद बढ्ने देखिएको छ। पछिल्लोपटक पार्टीका उपाध्यक्ष वामदेव गौतमलाई राष्ट्रियसभा सदस्य मनोनयन गरेसँगै मन्त्रिपरिषद् पुनर्गठनबारे बहस चलेको हो।