अनसनरत डा.केसीसँग पूर्वराष्ट्रपति यादवको भेटवार्ता

१६ असोज, काठमाडौं । पूर्वराष्ट्रपति डा.रामवरण यादवले अनसनरत डा.गोविन्द केसीसँग भेट गरेका छन् । शिक्षण अस्पताल पुगेका पूर्वराष्ट्रपति यादवले डा.केसीसँग भेटवार्ता गरेका हुन् ।

आज विश्व अहिंसा दिवसको दिन पूर्वराष्ट्रपति यादवले सत्याग्रहमै बसिरहेका डा. केसीसँग भेटवार्ता गरेका हुन् । भेटवार्ताका क्रममा डा. यादवले केसीको स्वास्थ्य अवस्था, कर्णालीमा चिकित्सा शिक्षा र स्रोत साधनको अभाव लगायतका विषयमा जिज्ञासा राखेका थिए ।

जवाफमा डा.केसीले स्वास्थ्य अवस्था विस्तारै विग्रदै गएपनि सरकारले माग सम्बोधनमा बेवास्ता गरेको गुनासो गरेका थिए । केसीको मागलाई सम्बोधन गर्न सरकारसँग आग्रह गर्दै पूर्वराष्ट्रपति यादवले माग सम्बोधनका लागि दबाब दिन आवश्यक रहेको बताए ।

साथै यादवले डा.केसी जस्तो सत्याग्राहीलाई सबैले बचाउनुपर्नेमा जोड दिए । भेटवार्तापछि सञ्चारकर्मीसँग कुरा गर्दै डा. यादवले देशको चिन्ता गर्ने केसीको स्वास्थ्य अवस्थालाई ध्यानमा राखेर माग सम्बोधनका लागि दबाब दिनुपर्ने बताए । डा.केसी भदौ २९ देखि अनसनमा छन् । अनसनको १९ औँ दिन पुग्दा उनको स्वास्थ्य अवस्था जटिल बन्दै गएको छ ।