बामदेवको अदालती झेल, मुद्दा फेरि हेर्दाहेर्दैमा !

१६ असोज, काठमाडौं । सत्तारुढ नेकपाका उपाध्यक्ष बामदेव गौतमको मुद्दा फेरि पनि हेर्दाहेर्दैमा राखिएको छ । राष्ट्रिय सभामा मनोनित गर्ने निर्णयविरूद्ध दर्ता भएको रिटको सुनुवाई शुक्रबार पनि नसकिएपछि हेर्दाहेर्दैमा राखिएको हो ।

अर्को सुनुवाई अर्को हप्ता बुधबारमात्रै हुने भएको छ। प्रधानन्यायाधीशसहित पाँच न्यायाधीशको संवैधानिक इजलासले मुद्दा सुनुवाई गरिरहेको छ। शुक्रबार दुई सरकारी वकिल र वामदेव पक्षका केही कानुन व्यवसायीहरूले बहस गरेका थिए ।

गौतमलाई सरकारको सिफारिसमा राष्ट्रपति विद्यादेवी भण्डारीले राष्ट्रियसभामा मनोनित गरेपछि उनले शपथ समेत लिइसकेका छन् । तर सर्वोच्चले भने गौतमलाई थप संवैधानिक जिम्मेवारी नदिन आदेश जारी गरेको छ। यसले बामदेवको मन्त्री बन्ने सपना तत्कालका लागि टुटेको छ भने थप जिम्मेवारी पाउने सम्भावना पनि कमजोर बनेको छ ।