खोलामा नुहाउन गएका ५ जना आमा छोराछोरी बेपत्ता

१६ असोज, बाजुरा । कवाडी खोला नुहाउन गएका बाजुराका एकै परिवारका पाँच जना बगेर बेपत्ता भएका छन् । हिमाली गाउँपालिका वडा नम्बर ५ को कवाडी खोलामा बगेर एकै परिवारका पाँच जना बेपत्ता भएका हुन्।

बेपत्ता हुनेमा हिमाली गाउँपालिका वडा नम्बर ५ कवाडीका धर्म नेपालीकी श्रीमती ३० वर्षीया सत्ता नेपाली, उनकी छोरी ५ वर्षीया आरती नेपाली, ४ वर्षीया छोरी सन्तोषी नेपाली, २ वर्षीय छोरा सम्मान नेपाली र १ वर्षीया छोरी किस्मती नेपाली रहेका छन्।

जिल्ला प्रहरी कार्यालय बाजुराका अनुसार उनीहरू शुक्रवार दिउँसो उक्त खोलामा नुहाउन गएका थिए। नुहाउन गएकै बेला आमा र अन्य चार बालबालिका खोलामा बगेको प्रहरीको भनाइ छ। बेपत्ताको खोजी चलिरहेको प्रहरीले जनाएको छ ।