निषेधित क्षेत्र तोडेर बुटवलमा वृह्त प्रदर्शन

१८ असोज, बुटवल । प्रदेश राजधानीको माग गर्दै रुपन्देहीको बुटवलमा प्रदर्शन गरिएको छ । प्रदेश ५ को राजधानी रुपन्देही हुनुपर्ने माग गर्दै बुटवलमा वृह्त प्रदर्शन भएको हो । प्रदर्शनलाई रोक्न निषेधित क्षेत्र घोषणा गरिएपनि संयुक्त संघर्ष समितिले प्रदर्शन चर्काएको हो ।

प्रदेश ५ को राजधानी सरकारले दाङको भालुवाङ प्रस्ताव गरेको छ । तर बुटवलमा त्यसको विरोधमा दुई दर्जन व्यवसायिक संस्थाहरुले संयुक्त प्रदर्शन गरेका हुन् ।

जिल्ला प्रशासन कार्यालयले ५ जनाभन्दा बढी भेला हुन नपाउने गरी चार दिनका लागि निषेधित क्षेत्र घोषणा गरेको ठाउँमै प्रदर्शन भएको हो । रुपन्देहीलाई राजधानी कायम गर्न माग गर्दै भएको प्रदर्शनमा उद्योगी, व्यवसायी र सर्वसाधारणले विरोध प्रदर्शन गरेका हुन् ।

बुटवल राजमार्ग चौराहाबाट सुरु भएको विरोध र्‍याली ट्राफिक चोकमा पुगेर कोणसभामा परिणत भएको थियो । कोणसभामा बोल्ने वक्ताहरुले रुपन्देहीमा प्रदेश सरकारका पूर्वाधारका लागि भएको करोडौं लगानी खेर जानेगरी राजधानी दाङ सार्ने प्रयास भएको भएपछि आन्दोलन थप चर्काउने चेतावनी दिएका छन् ।