अनसनरत डा.केसीसँग तत्काल वार्ता थाल्ने कांग्रेसको माग

१८ असोज, काठमाडौं । नेपाली कांग्रेसले अनसनरत डा.गोविन्द केसीसँग तत्काल वार्ता थाल्न आग्रह गरेको छ । कांग्रेस सभापति शेरबहादुर देउवाले प्रेस विज्ञप्ती सार्वजनिक गर्दै अनशनरत डा. गाविन्द केसीसँग तत्काल वार्ता थालेर उनको जीवन रक्षा गर्न सरकारसँग माग गरेका हुन् ।

डा.केसीको स्वास्थ्य अवस्था जटिल बनेको भन्दै नेपाली कांग्रेसले तत्कालै वार्ता थाल्न माग गरेको हो । अन्यथा अवस्था राम्रो नहुने पनि देउवाले चेतावनी दिएका छ्न । ‘डा. केसीको जटिल बनेको स्वास्थ स्थिति दृष्टिगत गरेर अविलम्ब वार्ता गर्न, मागहरू पूरा गर्न र उहाँको जीवन रक्षा गर्न किन्चित ढिलाइ नगर्न आग्रह गर्दै, ढिलाइको दुष्परिणाम गम्भीर हुने चेतावनी समेत म दिन चाहन्छु’ देउवाले विज्ञप्तीमा भनेका छन् ।

२१ दिनदेखि अनसनरत डा.केसीको स्वास्थ्य अवस्था जटिल बन्दै जाँदा आजदेखि अक्सिन मास्क लगाइएको छ । तर सरकारले अहिलेसम्म डा.केसीका मागका विषयमा छलफल समेत गरेको छैन् ।