बुटवलमा प्रहरीको हवाईफायर, मुख्यमन्त्री पोखरेलको गाडीमाथि ढुंगामुढा !

१८ असोज, बुटवल । प्रदेश ५ का मुख्यमन्त्री शंकर पोखरेल चढेको गाडीमाथि बुटवलमा ढुंगामुढा भएको छ । प्रदेश राजधानी दाङ सारेको विरोधमा आन्दोलित बनेका कार्यकर्ताले मुख्यमन्त्री पोखरेल चढेको गाडीमा ढुंगामुढा गरेका हुन् ।

ढुंगामुढाबाट गाडीमा केही क्षति पुगेको छ । तर मुख्यमन्त्री पोखरेल भने सुरक्षित छन् । बुटवलको चौराहा नजिक सिद्धार्थ कटेज अगाडि मुख्यमन्त्री सवार गाडीमाथि एकहोरो ढुंगामुढा भएपछि प्रहरीले हवाईफायर गरेको छ ।

मुख्यमन्त्रीको स्कर्टिङमा रहेका दुई वटा गाडीलाई समेत क्षति पुग्ने गरी आन्दोलित कांग्रेस कार्यकर्ताले ढुंगामुढा गरेपछि प्रहरीले हवाईफायर गरेर मुख्यमन्त्री पोखरेललाई निवास लगेको थियो । प्रदेश राजधानी बुटवलबाट दाङ सारेको विरोधमा कांग्रेसले बुटवलमा प्रदर्शन चर्काएको हो ।

आन्दोलनलाई मत्थर पार्न केन्द्रिय नेताहरुसँग सहमति खोज्न काठमाडौं आएका मुख्यमन्त्री पोखरेल आइतबार काठमाडौंँबाट विमानमा भैरहवा पुगेका थिए । भैरहवाबाट मुख्यमन्त्री निवास जाने क्रममा उनीमाथि बुटवल चोकमा ढुंगामुढा भएको हो ।