प्रदेश ५ सरकारको प्रस्तावको पक्षमा मतदान गर्न नेकपाको ह्वीप जारी

१९ असोज, बुटवल । प्रदेश ५ को नेकपा संसदीय दलले प्रदेशको नाम लुम्बिनी र राजधानी दाङको देउखुरी बनाउने प्रस्तावको पक्षमा अनिवार्य मत हाल्न आफ्ना प्रदेशसभा सांसदलाई ह्विप जारी गरेको छ ।

संसदीय दलको सोमबार बसेको बैठकमा मुख्यमन्त्री तथा संसदीय दलका नेता शंकर पोखरेलले सरकारको निर्णयका पक्षमै मत हाल्न ह्विप जारी गरेका हुन् । प्रदेशसभा सदस्य दधिराम न्यौपानेका अनुसार बैठकले प्रदेश सरकारको प्रस्तावको पक्षमा मत हाल्न ह्वीप जारी गरेको हो ।

प्रदेश ५ मा नेकपाका ६१, कांग्रेसका १९, जनता समाजवादीका ६ र राष्ट्रिय जनमोर्चाका १ गरी ८७ सदस्य छन् । सरकारको प्रस्ताव पारित हुनका लागि ५८ मत चाहिन्छ जुन नेकपाले ह्विप जारी गरेपछि पूरा हुने देखिएको छ । यसअघि दाङको देउखुरी क्षेत्रलाई प्रदेशको स्थायी राजधानी बनाउने प्रस्तावमा लुम्बिनी क्षेत्रका नेकपाका १४ सांसदले नोट अफ डिसेन्ट लेखेका थिए ।

यद्यपी नेपाली कांग्रेस र जनता समाजवादी पार्टीले भने सरकारको निर्णयको विरोध गरेका छन् । राजनीतिक सहमतिविना राजधानी दाङ लैजान लागिएको भन्दै कांग्रेस र जनता समाजवादी पार्टीले सदनमा विरोध जनाउने भएका हुन् । कांग्रेस संसदीय दलको बैठकले नेकपाले एकलौटी रूपमा राजधानी सार्न ल्याएको प्रस्तावविरुद्ध सदनमा छलफल हुन नदिने निर्णय गरेको कांग्रेस सचेतक निर्मला क्षेत्रीले बताइन् ।

सोमबार बिहान आयोजित सर्वदलीय बैठकमा समेत कांग्रेसका प्रतिनिधि सदन स्थगित गरेर राजनीतिक सहमति जुटाउने प्रस्ताव नेकपाले नमानेको भन्दै बाहिरिएका थिए । प्रदेशसभामा कांग्रेसका १९ सदस्य छन् ।

जनता समाजवादी पार्टीका सचेतक सन्तोषकुमार पाण्डेले पनि सरकारले ल्याएको प्रस्तावमाथि छलफल हुन नदिन सदनमा विरोध गर्ने बताए । प्रदेश ५ मा जनता समाजवादी पार्टीका ६ जना सांसद छन् ।