दाङलाई प्रशासनिक र बुटवललाई वित्तिय राजधानी बनाउने मुख्यमन्त्री पोखरेलको दाबी

१९ असोज, काठमाडौं । नेकपाकै सांसदले असन्तुष्टि जाहेर गरेपछि प्रदेश ५ का मुख्यमन्त्री शंकर पोखरेलले बुटवललाई वित्तीय र पर्यटकीय राजधानी बनाउने दाबी गरेका छन् । तर यसका लागि दाङको भलुवाङलाई प्रशासनिक राजधानी बनाउने प्रदेश राजधानी बनाउने प्रदेश ५ सरकारको प्रस्तावमा मतदान गर्नुपर्ने शर्त राखेका छन् ।

दाङको भालुवाङ स्थायी राजधानी बनाउने प्रस्ताव प्रदेशसभामा पेश भएपछि सत्तारुढ नेपाल कम्युनिस्ट पार्टी नेकपाकै १४ सांसदले फरक मत राखेपछि मुख्यमन्त्री पोखरेलले आश्वासनका लागि बुटवललाई पर्यटकीय तथा वित्तिय राजधानी बनाउने दाबी गरेका हुन् ।

संसदीय दलको सोमबार बसेको बैठकमा भौतिक पूर्वाधारमन्त्री बैजनाथ चौधरीले समेत बुटवलका जनताको भावनालाई सम्बोधन गर्नुपर्ने धारणा राखेका थिए । बैठकमा मुख्यमन्त्री एवं नेकपा संसदीय दलका नेता पोखरेलले भालुवाङमा संरचनाहरु नबन्दासम्म अस्थायी राजधानी बुटवलमै रहने बताए । साथै बुटवल र लुम्बिनी करिडोरलाई छोएका क्षेत्र समेटेर वित्तीय र पर्यटकीय राजधानीका रुपमा विकास गर्ने र भालुवाङलाई प्रशासनकीय राजधानीका रुपमा अगाडि बढाउने उनले बताए ।

तर अहिले दाङलाई राजधानी बनाउने सरकारको प्रस्तावपको पक्षमा मतदान गर्न मुख्यमन्त्री पोखरेलले ह्वीप जारी गरेका छन् । ह्वीप जारी गर्ने भएपछि अब असन्तुष्ट सांसदलाई पनि सरकारको प्रस्तावको पक्षमा मतदान गर्नुपर्ने नैतिक दबाब बढेको छ ।