गोदावरीका प्रमुख महर्जन १६ औँ दिनमा कोरोनामुक्त

२० असोज, ललितपुर । गोदावरी नगरपालिकाका प्रमुख गजेन्द्र महर्जन १६ औँ दिनमा कोरोना सङ्क्रमणमुक्त भएका छन् । यही असोज ५ गते ज्वरो, खोकी र जीउ दुख्ने समस्या देखिएर महर्जनले घरमै बसी भोलिपल्ट स्वाब परीक्षण गर्न पठाउँदा ९ गते मात्रै नतिजा पोजेटिभ आएको थियो ।

“म आज १६ औँ दिनमा कोरोना सङ्क्रमणबाट मुक्त भएँ ”, प्रमुख महर्जनले बताए । उनले भने, “अब म केही दिन स्वास्थ्यको मापदण्ड पालना गरेर घरमै बस्छु र भीडभाडमा जान्न ।” नगरपालिकाको काम भने केही दिनका लागि घरबाटै गर्ने महर्जनले जानकारी गराए ।

महर्जनकी धर्मपत्नी गङ्गामायाको कोेभिड परीक्षणको नतिजा भने आउन बाँकी रहेको बताइएको छ । सोमबार मात्रै महालक्ष्मी नगरपालिकाका प्रमुख रामेश्वर श्रेष्ठ कोरोना सङ्क्रमणमुक्त भएका थिए । यसैगरी ललितपुर महानगरपालिकाका प्रमुख चिरीबाबु महर्जन भने कोरोना सङ्क्रमणका साथै छातीमा समस्या देखिएर यही असोज १६ गतेदेखि सानेपाको स्टार अस्पतालमा उपचाररत रहेको महानगरका प्रवक्ता राजु महर्जनले बताए ।

गोदावरीमा नगरस्तरीय रक्तदान

कोरोना कहरका बीच मुलुकमा खड्किरहेको रगत अभावको समस्या समाधान गर्न गोदावरीमा नगरस्तरीय रक्तदान कार्यक्रम भएको छ । वडा नं ३ टौखेलमा आज १०७ पिन्ट रगत सङ्कलन गरिएको हो । कार्यक्रमका संयोजक पुरुषोत्तम सिलवालले नेपाल रेडक्रस सोसाइटी ललितपुरलाई सो रगत प्रदान गरिएको बताए ।

उनले भने, “मुलुकमा दिनानुदिन कोरोना त्रास बढेका बेला रगत अभावका कारण कसैको जीवन जोखीममा नपरोस् भनेर सावधानीपूर्वक रगत सङ्कलन ग¥यौँ ।” यसैगरी यही असोज २२ गते वडा नं ११ चापागाउँस्थित प्याङगाउँ र २५ गते वडा नं ५ लेलेस्थित टीकाभैरवमा रक्तदान कार्यक्रम आयोजन गरिने भएको सिलवालले जानकारी गराए ।