लोकतन्त्रको खोल ओढेको निरंकुश ओली सरकार : कांग्रेस नेता केसी

२२ असोज, काठमाडौं । पूर्वमन्त्री तथा नेपाली कांग्रेसका प्रभावशाली नेता अर्जुननरसिंह केसीले लोकतन्त्रको खोल ओढेकाे प्रधानमन्त्री केपी शर्मा ओली नेतृत्वको सरकार इतिहासकै खराब सरकार भएको टिप्पणी गरेका छन् ।

डा.गोविन्द केसीको अनशनलाई बेवास्ता गरेर ओली सरकार दम्भी र निरंकुश बनेको पनि केसीको टिप्पणी छ । बाँदरले रक्सी पिएको, बिच्छीले डसेको र त्यसमाथि पनि भूत वा दानवी शक्ति सवार भएपछि खराबै मात्र गर्ने भन्दै नेता केसीले ओली सरकारले पनि अहिले जताततै खराब काम मात्रै गरिरहेको बताएका छन् ।

अर्थात ‘बाँदरले रक्सी पिएको, बिच्छीले डसेको त्यसमाथि भूत वा दानवी शक्ति सवार भएपछि खराबै मात्र गर्छ भनेझै वर्तमान दम्भी र चरम निरंकुश सरकार लोकतन्त्रको खोल ओढेर सत्याग्राही डा.केसी र आम जनमतलाई खिल्ली नउडाउ । तत्काल उच्चस्तरीय संवाद गरी डा. केसीको माग सम्बोधन गर’ सामाजिक सञ्जालमा नेता केसीले भनेका छन् ।

नेता केसीले जनताको माग सम्बोधन नगर्ने र अनसनरत डा.केसीलाई मृत्युको मुखमा पुर्याउने ओली सरकारको कामले महंगो मूल्य चुकाउनुपर्ने चेतावनी पनि दिएका छन् । अन्यथा यसबाट श्रृजित गम्भीर परिणामको जिम्मा केवल नेकपा सरकार मात्र हुने उनले उल्छलेख गरेका छन् ।

“न कूपखननं युक्तं प्रदीप्त वान्हिना गृहे” घरमा आगो लागिसकेपछि कुवा खन्नु मूर्खताको पराकाष्टा हो । वर्तमान कम्युनिस्ट सरकार निर्ममता, निरंकुशता, भ्रष्टाचार र अहंकारको गर्तमा डुबेको छ । तत्काल डा.केसीलाई सम्बोधन गर्दै जीवन रक्षा गर,अन्यथा यसको भयावह परिणामको जिम्मा केवल प्रम ओलीको हुनेछ । नेता केसीले भनेका छन् ।

साथै नेता केसीले कोरोना महामारीमा सरकारले कुनै गतिलो योजनाका साथ काम नगरेले आफ्नो सुरक्षा आफै गर्नुपर्ने अवस्था आएको पनि बताएका छन् ।

पछिल्लो समय दैनिक संक्रमित बढिरहदा सरकार कानमा तेल हालेर बसेको भन्दै उनले सरकारबाट भरपर्नुको साटो आफ्नो सुरक्षा आफै गर्नु उत्तम हुने सुझाव दिएका हुन् ।