आइसोलेसनमा नबस्ने संक्रमितलाई ६ महिना सजाय !

२३ असोज, काठमाडौं । सरकारले आइसोलेसनमा नबस्ने संक्रमितलाई जेल हाल्ने चेतावनी दिएको छ । पछिल्लो समय संक्रमितहरुले लापरवाही गरेर कोरोना फैलाएको पाइएपछि स्वास्थ्य तथा जनसंख्या मन्त्रालयले कडा नियम ल्याएको हो ।

मन्त्रालयले आइसोलेसनमा नबस्ने संक्रमितहरूलाई ६ महिनासम्म कैद गर्ने गरी कारबाही प्रक्रिया समेत अगाडी बढाईसकेको छ । केही संक्रमितहरू आइसोलेसनमा नबसेर समुदायमा कोरोना फैलाइरहेको पाइएपछि संक्रामक रोग ऐन अनुसार उनीहरुलाई ६ महिनासम्म जेल हाल्न लागिएको मन्त्रालयका प्रवक्ता डा. जागेश्वर गौतमले बताए ।

गौतमका अनुसार यसरी जेल हाल्ने व्यवस्थालाई कार्यान्वयन गर्न गृह मन्त्रालयमार्फत सबै जिल्ला प्रशासन कार्यालयलाई निर्देशन पठाइएको छ । केही संक्रमितहरू निको नभई पनि बाहिर हिँडेको जानकारी आएको भन्दै कारबाही गर्नुको विकल्प अब नरहेको गौतमले बताए ।

साथै, परीक्षणका लागि स्वाब दिएका व्यक्तिहरू रिपोर्ट नआइन्जेल अनिवार्य क्वारेन्टाइनमा बस्न समेत मन्त्रालयले आग्रह गरेको छ। मानिसहरू स्वाब दिने र रिपोर्ट नआई काममा फर्किने गर्दा त्यो बीचको समयमा अन्य व्यक्तिमा संक्रमण सर्ने जोखिम रहेको भन्दै मन्त्रालयले आग्रह पनि गरेको छ ।