लुम्बिनी प्रदेशमा कोरोना संक्रमितको निःशुल्क उपचार कायमै

४ कात्र्तिक, बुटवल । लुम्बिनी प्रदेश सरकारले सबै कोरोना संक्रमितको उपचार निःशुल्क गर्ने योजनालाई निरन्तरता दिएको छ । मुख्यमन्त्री शंकर पोखरेलले प्रदेशका चारवटा कोरोना अस्पतालबाट संक्रमितहरुको उपचार निःशुल्क गर्ने जानकारी दिएका हुन् ।

मुख्यमन्त्री पोखरेलले कोरोना अस्पतालमा संक्रमितको उपचार निःशुल्क भइरहेको जनाएका छन् । यसअघि स्वास्थ्य तथा जनसंख्या मन्त्रालयले गरिब, अति विपन्न तथा अशक्त बाहेकका कोरोना संक्रमितको उपचार सरकारले नगर्ने निर्णय गरेको थियो। सरकारको उक्त निर्णयपछि सरकारको आलोचना भइरहेको छ।

प्रदेशको सामाजिक विकास मन्त्रालयका सचिव माहादेव पन्थले पनि प्रदेशका चारवटै अस्पतालमा संक्रमितको उपचार निःशुल्क नै भएको बताए।

संघीय सरकारले सोमबारदेखि गरिब विपन्न तथा अशक्त बाहेकका कोरोना संक्रमित बिरामीको शुल्क लिने बताएको भए पनि लुम्बिनी प्रदेशका चारवटै अस्पतालमा निःशुल्क नै भएको उनले बताएका छन् ।