असईको हत्या भएकै ठाउँमा भेटियो बेपत्ता प्रहरी जवानको शव

४ कार्तिक, धनगढी । कैलालीको जुगेडा अस्थायी प्रहरी चौकीबाट बेपत्ता प्रहरी जवान रामबहादुर साउदको शव भेटिएको छ । प्रहरी असई गोविन्द विश्वकर्माको शव यसअघि नै भेटिएको थियो । शनिबार राती तस्करहरुले प्रहरी सहायक निरीक्षक गोविन्द विकको हत्या गरेपनि जवान साउद भने वेपत्ता थिए ।

जिल्ला प्रहरी कार्यालय कैलालीले पक्राउ गरेकाको प्रारम्भिक बयानका आधारमा जवान साउदको शव फेला परेको हो । उनको शव प्रहरी सहायक निरीक्षक विकको शव पाएको भन्दा उत्तरतिर मोहना नदीकै बीचमा बालुवामुनि पुरिएको अवस्थामा फेला परेको हो ।

घटनाबारे थप अनुसन्धान भइरहेको छ । प्रहरीको प्रारम्भिक निष्कर्षअनुसार दुवै जनालाई तस्करहरुले समातेर विभत्स हत्या गरेका थिए । पक्राउ परेका ११ जनामध्ये केहीको बयान अनुसार बेपत्ता भएका जवान साउदको शव भेटिएको हो ।