ललितपुरमा ८ बर्षीया बालिकाको अपहरण, ३ जना पक्राउ

४ कात्र्तिक, काठमाडौं । ललितपुरको महालक्ष्मी नगरपालिका मनकामना चोकबाट ८ बर्षीया बालिकाको अपहरण भएको छ । सोमबार राती ७ बजेतिर बालिकाको अपहरण भएको थियो । महानगरीय प्रहरी परिसर ललितपुर अन्तर्गत रहेका डीएसपी मित्रबन्धु शर्माका अनुसार बालिका अपहरण भएपछि प्रहरी टोली व्यापक रुपमा परिचालन गरिएको थियो ।

बारा सिम्रौनगढ नगरपालिका १ घर भइ हाल ललितपुर जिल्ला महालक्ष्मी नगरपालिका वडा नम्बर ४ मनकामना चोकस्थित बस्ने गुड्डी साहकी ८ वर्षीय छोरीको अपहरण भएको प्रहरीको भनाई छ । अपहरणमा परेकी बालिकाको प्रहरीले सोमबार राती नै उद्धार गरेको हो ।

बालिकाको उद्धार गर्दै प्रहरीले ३ जना अपहरणकारीलाई पक्राउ गरेको छ । पक्राउ पर्नेमा सर्लाही हरिवन नगरपालिका वडा नम्वर ८ बासटोल घर भएका ३० वर्षीय राजु कार्की, काभ्रे नमोबुद्ध नगरपालिका वडा नम्वर ८ का २३ वर्षीय सीता परियार र धनुषा धारपानीका ४० वर्षीय कृष्ण तोलामी छन् ।

बालिकाको अपहरण गरेपनि कारणबारे अहिलेसम्म खुलेको छैन् । अपहरणपछि हरिसिद्धीमा रहेको सीताको कोठामा बालिकालाई बन्धक बनाइएको थियो । अपहरणको योजना राजु कार्कीले बनाएको भएपनि फिरौतीका लागि वा अरु केही कारण अपहरण गरिएको हो भन्ने कुरा खुलेको छैन् ।