३० लाख लिएर क्राईमका इन्चार्ज तस्करीलाई सघाउँदै

५ कार्तिक, वीरगञ्ज । पर्साको अलौं र कोनियाका केही तस्करहरुलाई संरक्षण गर्दै क्राईम ब्रान्चका सई प्रकाश रावतले उनीहरुका लागि सुराकीको काम गर्दै आएको बताइएको छ । तस्करी गराउन दिएवापत रावतले लिएको नजरानाको सोझो गर्दै प्रदेश प्रहरी टोली छड्के निगरानीको लागि आउँदा तस्करलाई पूर्व जानकारी दिने गरेकाे आराेप लागेकाे छ ।

जिल्ला प्रहरी कार्यालयकै अपराध अनुसन्धान शाखाको संरक्षण र निगरानीमा अलौंबाट व्यापक तस्करी भएको प्रमाणहरु छताछुल भएपछि प्रहरीको माथिलो निकायले निगरानी बढाएको छ । प्रदेश प्रहरी कार्यालयबाट खटेको टोलीले प्रहरी चौकी सिर्सियाका सई गजानन्द साहसँग सहयोग माग्दा साेकाे जानकारी क्राईमका सई रावतलाई एकछिनमै थाहा हुने र रावतले सो जानकारी तस्करलाई गराउने गरेकाे तथ्य फेला परेकाे स्राेतले बताएकाे छ ।

माथिल्लो कार्यालय तहबाट तस्करी नियन्त्रणको टोली आएको बेला सई रावत तस्करहरुलाई सुचना दिएर समय र बाटो परिवर्तन गराउने गरेको समाचार स्राेतकाे दावी छ । अलौं नाकाबाट अच्छेलाल र बैधनाथ सहित ९ जना तस्करले ठुलो परिमाणमा कपडा, हार्डवेयर, मोटरपार्टस लगायतका समान भारतबाट निर्वाधरुपमा भित्र्याउने गरेका छन् । तस्करहरुले सई रावतलाई यो महिनामा मात्रै ३० लाख भन्दा बढी रकम बुझाएको श्रोतको दाबी छ ।

समाचार अनुसार पर्सा क्राईमको तस्करसँगको सहकार्यको विभिन्न समयका रेकर्ड तथा प्रमाणहरु समेत फेला परेका छन् । क्राईमले रकम बुझने र अर्को टोली गएर मालसमान समातेपछि रावतले रकम बुझेको आधा दर्जन घटना बाहिरिएका छन् । रावतले आफै रकम नबुझी अलौंका केही युवालाई आफनो अघोषित घुमुवा खटाई तस्करहरुबाट रकम बुझ्ने गरेका हुन् ।

जिल्ला प्रहरी कार्यालय श्रोतका अनुसार तस्करहरुसँग रकमको बार्गेनिङ्ग गर्ने व्यक्तिहरु प्रहरी होइनन्, तर पनि उनीहरु अपराध अनुसन्धान शाखाभित्र लामाे समय बिताउँछन् । सई रावतलाई रकम पठाएपनि मालसमान अर्को टोलीले समाएपछि विलाप गर्दै तस्करहरुले रावतलाई रकम पठाएको खुलासा गरेका हुन् । अलौं नाकामा स्थानीय तस्करहरुको प्रभाव बढी रहेको छ ।

स्थानीय प्रहरीदेखि जिल्ला प्रहरी तथा अलौस्थित सशस्त्र प्रहरी बेसले तस्करीलाई सघाएपछि दैनिक लाखौको राजश्व छली भइरहेको छ । दैनिक २५ देखि ३० टन केराउ तिलावे नजिकैको शिवम एग्रोको गोदामबाट भारततर्फ अवैध निकासी भइरहेको छ ।

त्यस्तै भारतबाट दैनिक ठुलो परिमाणमा भित्रिने लता कपडा, हार्डवेयर लगायतका समान जगनाथपुरमा ट्रकमै लोड भई काठमाडाैं, पोखरा लगायतको ठाउँमा पुग्ने गरेका छन् ।

र याे पनि…