गृहमन्त्री बादल माधव नेपालको गुटमा !

१८ कात्तिक, काठमाडौं । सत्तारुढ नेकपाको विवाद चर्किदै जाँदा नेताहरु शीर्ष नेताको प्रवृति हेरेर गुटमा लाग्न थालेका छन् । पछिल्लो समय पूर्व एमाले र पूर्व माओवादीका नेताहरु आफ्नो स्वार्थ हेरी हेरी गुटमा लाग्न थालेका छन् ।

पछिल्लो समय नेकपाभित्र आफ्नो स्वार्थ हेरेर गुटमा बस्ने गृहमन्त्री रामबहादुर थापा बादल माधव नेपाल गुटमा लागेको देखिएको छ । गृहमन्त्री भएयता प्रचण्ड गुट छाडेर प्रधानमन्त्री केपी शर्मा ओलीको गुटमा लागेका बादल पछिल्लो समय नेकपा विवाद उत्कर्षमा पुग्दा माधव नेपालको गुटमा देखिएका हुन् ।

खासगरी ओली र प्रचण्डबीच नेकपा फुटाउने विषयमा तिब्र छलफल र मतभेद छ । ओलीले तत्काले फुटाउने पक्षमा छन् । प्रचण्ड पनि पार्टी फुटाउनैपर्ने आवश्यकता महसुस गरिरहेका छन् । तर माधव नेपाल भने अहिल्यै नेकपा फुटाउन नदिने पक्षमा छन् ।

दुवै पक्ष मिलेर जानुपर्ने अडानमा रहेका माधव नेपाललाई गृहमन्त्री बादलले साथ दिइरहेका नेताहरुको भनाई छ । यस विषयमा बादलको प्रचण्ड निकट नेताहरुसँग विवाद समेत गरेका थिए । पूर्वमाओवादी भएकाले प्रचण्ड गुटमा खुलेर लाग्नुपर्ने दबाब बढेपनि बादल भने तटस्थ रहन नेपालको गुटमा लागेको चर्चा छ ।