प्रचण्डविरुद्ध सिंहदरबारमा बादल र विष्णुको गोप्य छलफल

२१ कार्तिक, काठमाडैं। धुम्बाराहीमा प्रचण्ड पक्षका नेताहरुको छलफल चलिरहदा ओली पक्षका नेताहरु सिंहदरबारको गोप्य छलफलमा रहेको पाइएको छ । धुम्बाराहीमा नेकपाका कार्यकारी अध्यक्ष प्रचण्डले सचिवालयको अनौपचारिक बैठक बोलाउँदा सहभागि नभएका गृहमन्त्री रामबहादुर थापा बादल र अर्थमन्त्री तथा महासचिव विष्णु पौडेलबीच सिंहदरबारमा छुट्टै गोप्य छलफल भएको हो ।

छलफलमा पार्टी एकता, आगामी महाधिवेशन र ओली तथा प्रचण्डबीचको विवाद र समाधानका विषयमा कुराकानी भएको थियो । गृह मन्त्रालयमा झन्डै एक घन्टा भन्दा बढी छलफललाई चाँसोका साथ हेरिएको छ । बादल र पौडेल दुवै ओली पक्षका नेता हुन् ।

प्रचण्ड गुटबाट छुट्टिएका बादल पछिल्लो समय ओलीलाई साथ दिदै आएका छन् । पार्टीका मूलभूत विषयमा उनी प्रचण्डसँग नजिक आउने गरेका छन् । अघिपछि उनी ओलीतिर लहसिने गरेका छन् । बादल र विष्णु पौडेल सहभागि नभएपछि प्रचण्ड गुटको भेला पनि त्यति सार्थक नभएको नेकपाकै नेताहरुको टिप्पणी छ ।