चुरोट खाँदै गर्दा ‘हेपेको’ भन्दै खुकुरी प्रहार गरी साथीको हत्या !

२३ कार्तिक, मकवानपुर । समाजमा पछिल्लो समय अपराधका घटना दिनप्रति दिन बढ्दै गइरहेका छन् । चाहे त्यो समुदायमा होस अथवा घरपरिवारका सदस्यबिच होस जहाँ पनि अपराध बढिरहेका छन् ।  यस्तै भएको छ मकवानपुरमा पनि, दुई साथीबीच सामान्य कुराकानी हुँदै गर्दा यसले विवादको मोड लिएपछि आफ्नै साथीलाई खुकुरी प्रहार गरि साथीले नै हत्या गरेका छन् ।

जिल्लाको बकैया गाउँपालिका-४ नयाँदमार बस्ने २० वर्षीय विकास वाईवाको कार्तिक २१ गते दिउँसो हत्या गरेको अभियोगमा सोही ठाउँ बस्ने २० वर्षीय शंकर भन्ने भीमराज भोलनलाई शनिबार साँझ प्रहरीले पक्राउ गरेको छ ।

जिल्लाको सिमाद खोलाको बगरस्थित फुटबल चौरमा बसेर चुरोट खाइरहेका विकाससँग विवाद हुँदा भिमराजले साथमा बोकेको खुकुरी प्रहार गरी विकासको हत्या गरेका थिए ।

उनलाई आफ्नै ‘साथी’ले हत्या गरेका थिए। हत्या गर्ने व्यक्ति २० वर्षीय शंकर भन्ने भीमराज भोलन रहेको प्रहरीको भनाइ छ। उनले आफ्ना साथीमाथि पटक-पटक खुकुरी प्रहार गरी हत्या गरेको प्रहरीले जनाएको छ। शंकरले खुकुरी प्रहार गरी विकासको घाँटीसमेत छिनालिदिएको प्रहरीले जनाएको छ।

घटना पश्चात् फरार भीमराजलाई व्यापक रुपमा खोजी गर्ने क्रममा ललितपुर बागमती गाउँपालिका-२ माल्टाका स्थानीयले शंका लागी नियन्त्रणमा लिई खबर गरे पश्चात जिल्ला प्रहरी कार्यालय मकवानपुर, ईलाका प्रहरी कार्यालय ठिंगन र प्रहरी चौकी भट्टेडाँडा ललितपुरबाट खटिएको प्रहरीले पक्राउ गरेको हो ।

भिमराज उपर कर्तव्य ज्यान सम्बन्धी कसूरमा अनुसन्धान तथा आवश्यक कानुनी कारवाही भइरहेको जिल्ला प्रहरी कार्यालय मकवानपुरले जनाएको छ ।