नेकपा महासचिव पौडेल नेतृत्वको कार्यदल पुनः सक्रिय

२४ कार्तिक, काठमाडौं । सत्तारुढ नेपाल कम्युनिष्ट पार्टी ‘नेकपा’भित्र विवाद चुलिएसँगै विवाद समाधानका उपाय पहिल्याउन गठन गरिएको कार्यदल पुनः सक्रिय भएको छ ।  पार्टी फुटको संघारमा उभिएको भन्दै संकट समाधानका उपाय पहिल्याउन उक्त कार्यदल सक्रिय भएकाे हाे।

पार्टीका महासचिव एवं अर्थमन्त्री विष्णु पौडेल नेतृत्वको उक्त कार्यदलले यसअघि पनि अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीचको मनमुटाव न्यूनीकरण गर्दै जिम्मेवारी बाँडफाड गर्नुपर्ने सुझाव दिएको थियो ।

स्थायी कमिटी बैठकसँगै चर्किएको विवाद टुंगोमा पुर्‍याउने क्रममा यही कार्यदलले अध्यक्षद्वय ओली र प्रचण्डको जिम्मेवारी निर्धारण गर्दै आगामी चैतमा एकताको महाधिवेशन गर्ने सुझाव पेस गरेको थियो ।

कार्यदलको सुझाव परिमार्जनसहित स्थायी कमिटी बैठकले १५ बुँदे निर्णय गरेपछि नेकपाको संकट टरेको मानिएको थियो । अहिले फेरि अध्यक्ष ओली तथा अर्का अध्यक्ष प्रचण्ड र वरिष्ठ नेता माधवकुमार नेपालबीच विवाद चर्किएको छ ।

महासचिव पौडेलले कार्यदलका सदस्यहरुसँग परामर्श गरेर आजै प्रधानमन्त्री ओलीसँग भेट्ने तयारी रहेको बुझिएको छ । दुवै अध्यक्षद्वयलाइ पुनः सहमतिमा ल्याउन कार्यदलले गृहकार्य गर्ने बताइएको छ ।