प्रधानमन्त्रीलाई पूर्व माओवादीले छोड्दै

२४ कात्तिक, काठमाडौं । चुलिँदै गएको सत्तारुढ नेपाल कम्युनिस्ट पार्टी (नेकपा) को विवादले झनै उग्र रुप लिने भएको छ । प्रधानमन्त्री केपी ओलीलाई पूर्व माओवादी नेताहरुले अब साथ दिन नसकिने बताएसँगै नेकपा विवादले चर्को रुप लिने भएको हाे । पूर्व एमाले र पूर्व माओवादी भन्ने पार्टीभित्र नरहेको भनिएता पनि पूर्व माओवादी खेमाका नेताहरुले प्रधानमन्त्रीसमेत रहेका पार्टी अध्यक्ष ओलीलाई भेटेर नै अब आउने दिनमा सहयोग र समर्थन गर्न नसक्ने बताएका हुन् ।

पार्टी एकताका बेला देखिनै अध्यक्ष र शीर्ष नेताहरुको हात मिलेतापनि दुवै पार्टीका तल्ला कमिटीसम्मका सबै सदस्यहरुको मन मिलेको थिएन । त्यसैको असर अहिले नेकपामा नराम्रोसँग देखिन थालेको छ । पूर्व माओवादी खेमाका नेताहरुले कुनै पनि हालतमा ओलीसँग झुक्न नहुने भन्दै अध्यक्ष पुष्पकमल दाहाल ‘प्रचण्ड’लाई बारम्बार पार्टीभित्र आफ्नो उपस्थिति दह्रिलो बनाउन आग्रह गरिरहेका छन् ।

ओलीका भाका र उखान टुक्काका पछाडी नलाग्न पूर्व माओवादीले अध्यक्ष प्रचण्डलाई भनिरहेको स्रोतको दावी छ । तर पूर्व एमाले पनि नेकपाभित्र आफ्नो पकड नछोड्ने र सकेसम्म पूर्व माओवादीलाई पेलेरै जनो रणनीति बनाउन लागेका छन् । यस कार्यमा स्वयंं प्रधानमन्त्री ओली नै अगाडी सरेपछि अब पार्टी एकता भन्दा पनि विभाजनको बाटोमा अगाडि बढिसकेको आंकलन गर्न थालिएको छ । पूर्व एमालेले भर्चुअल बैठकदेखि कार्यकर्ता भेलासम्म थालिसकेकाे छ भने पूर्व माओवादी पनि साेही अनुसारकाे कदम चाल्ने तयारीमा रहेकाे बुझिएकाे छ ।

गत असार तेस्रो साता नेकपा भित्रैबाट अध्यक्ष र प्रधानमन्त्री दुबै पदबाट राजीनामा दिन दबाब खेपिरहेका प्रधानमन्त्री ओलीले पूर्व माओवादी खेमाका जनार्दन शर्मा, टोपबहादुर रायमाझी, मणि थापा, हरिबोल गजुरेल, देवेन्द्र पौडेल, लेखराज भट्ट, पम्फा भुसाल लगायतकाे साथ पाएका थिए । तर, उनीहरुलाई त्यसबेला साथ लिँदा देखाएको सपना अहिले आएर फोस्रो र झुट बाहेक केही नभएको पूर्व माओवादी नेताको बुझाइ रहेको छ ।