महासचिव पौडेललाई सचिवालय बैठक बोलाउने जिम्मा

२५ कार्तिक, काठमाडौं । नेकपाभित्र बढ्दै गएको विवाद मिलाउन प्रधानमन्त्री केपी ओली बैठक बोलाउन तयार भएका छन् । विवादले उच्चरुप लिएपछि ओलीले महासचिव विष्णुप्रसाद पौडेललाई बैठक बोलाउने जिम्मा दिएका छन् ।

बैठक बोलाउने जिम्मा पाए लगत्तै महासचिव पौडेल सोमबार नै खुमलटार पुगेका थिए । नेकपाको सचिवालय बैठक असोज १९ गतेदेखि बस्न सकेको छैन । पार्टीभित्र विवाद बढ्दै गएपछि सचिवालय बैठक रोकिएको छ ।

कार्यकारी अध्यक्ष पुष्पकमल दाहाल प्रचण्डसहित बहुमत सचिवालय सदस्य ‘प्रचण्ड, झलनाथ खनाल, माधवकुमार नेपाल, वामदेव गौतम र नारायणकाजी श्रेष्ठ’ ले बैठक बोलाउन आग्रहसहित लिखित पत्र नै ओलीलाई बुझाएका छन् । कात्तिक २३ मा बालुवाटार पुगेर बैठक बोलाउन माग गर्दै पत्र बुझाएका थिए ।

यता, प्रचण्डसहितका पाँच नेता भने सचिवालय बैठक नबोलाइएको भन्दै अहिले केहीबेरमा धुम्बाराहीमा बैठक बस्ने तयारी गरिरहेका छन् । यसैबीच प्रधानमन्त्री ओली र र ‘प्रचण्ड’बीच भेटवार्ता सुरू भएको छ। भेटमा पार्टीमा देखिएको विवाद र सचिवालय बैठकबारे छलफल भैइरहेको छ । बालुवाटारको बैठक सक्ने बित्तिकै प्रचण्ड धुम्बाराहीमा जानेछन् ।