युवराज खतिवडालाई संसदीय समितिमै आपत !

२७ कार्तिक, काठमाडौं । बिहीबार अमेरिकाका लागि प्रस्तावित राजदूत युवराज खतिवडाको सुनुवाई  थियो । पूर्वअर्थमन्त्री समेत रहेका खतिवडा अमेरिकाका लागि नेपाली राजदूत भएपछि उनको आलोचना चुलियो । तर पनि उनको नियुक्ती प्रक्रिया रोकिएन ।

यसका लागि संसदीय सुनुवाई भयो । संसदीय सुनुवाईमै उनलाई फलामको चिउरा चपाए सरह कडा शब्दमा नेकपाका सांसदले आलोचना गरेका छन् । अर्थमन्त्री भएर अमेरिकी परियोजना एमसिसी पारित गर्न नसकेको भन्दै नेकपा सांसदले उनको आलोचना गरेका थिए ।

पूर्वअर्थमन्त्री समेत रहेका सुरेन्द्रप्रसाद पाण्डेले खतिवडाको चर्को आलोचना गरेका थिए । उनैले संसदीय सुनुवाईका क्रममा अर्थमन्त्री भएर राम्रो काम गर्न नसकेका बेला अमेरिकाका लागि राजदूत भएर कसरी काम गर्नुहुन्छ ? भन्दै खतिवडालाई प्रश्न गरेका थिए ।

जवाफमा खतिवडाले परराष्ट्र मन्त्रालयको निर्देशनअनुसार काम गर्ने बताए । पछिल्लो समय ओलीको चाकरी गरेर खतिवडा अर्थमन्त्रीपछि अमेरिकाका लागि नेपाली राजदूत बनेको आरोप छ । सोही कारण नेकपाभित्रै उनको आलोचना सबैभन्दा धेरै हुने गरेको छ ।

नेकपाकै सरकारमा अर्थमन्त्री भएर पनि सांसदबाट कडा प्रश्नको सामना गर्नु परेपछि उनलाई आपत परेको थियो । गुटको कुरा नमिल्दा उनलाई प्रचण्ड र माधव नेपाल पक्षका सांसदले ओलीको चाकरीबाज भन्दै र्‍याखर्‍याख्ती पारेका थिए ।