सिरहामा नक्कली नोटको कारखाना, ७ लाखसहित ३ जना पक्राउ

२७ कार्तिक, धनुषा । सिरहाबाट झण्डै ७ लाख नक्कली नेपाली नोटसहित ३ जना पक्राउ परेका छन् । गोलबजार नगरपालिका ६ लामाटोलबाट बिहीबार दिउँसो ७ लाख नक्कली नोटसहित तीन जना पक्राउ परेका प्रहरीले जनाएको छ ।

पक्राउ पर्नेमा गोलबजार नगरपालिका १२ बेतौनाका २५ वर्षीय धिरज यादव, २० वर्षीय सञ्जय राय र कल्याणपुर नगरपालिका ७ का २४ वर्षीय विमलेन्द्र नायक रहेका प्रहरीले जनाएको छ ।

इलाका प्रहरी कर्यालय गोलबजार र सशस्त्र प्रहरी बेस क्याम्प गोलबजारको संंयुक्त टोलीले उनीहरुको साथबाट ६ लाख ८४ हजार रुपैयाँको नक्कली नोट बरामद गरेको छ ।

यसमध्ये ३ लाख नक्कली नोट पूर्ण रुपमा तयारी अवस्थामा र ३ लाख ८४ हजार फोटोकपी कागजमा प्रिन्ट गरी राखिएको र काट्न बाँकी रहेको अवस्थामा बरामद भएको हो । पक्राउ परेका तीनै जना गत असोज २१ गतेदेखि गोलबजार नगरपालिका(६ लामाटोलका वीरेन्द्र महतोको घर भाडामा लिएर बस्दै आएका थिए ।

पक्राउ परेका तीनै जनामाथि थप अनुसन्धान भइरहेको छ ।