सुर्खेतमा बँदेल मारेर मासु बेच्ने ३ जना पक्राउ

२९ कार्तिक, सुर्खेत । स्थानीय वन जंगलमा पाइने बँदेल मारेर त्यसको मासु बेच्ने चौकुने गाउँपालिकाका युवा सुर्खेतमा पक्राउ परेका छन् । सुर्खेतको मूलपानी चोकमा प्रहरीको चेकजाँचका क्रममा उनीसहित तीन जना पक्राउ परेका हुन् । चौकुनेमा जंगली बँदेल धेरै पाइने गरेको छ ।

पक्राउ पर्ने चौकुनेका युवा दीपेन्द्रराज गिरी हुन् । चौकुने गाउँपालिका–८, घर भएका उनी ३५ बर्षका हुन् । शहर बजारमा बँदेलको मासुको भाउ महंगो हुने भएपछि उनले मारेर बेच्न थालेका थिए । तर प्रहरी चेकजाँचमा लुकाउन नसक्दा उनी पक्राउ परेका हुन् ।

गिरीसँगै सुर्खेतकै बराहतताल गाउँपालिका–८ अर्जुन गौतम र वीरेन्द्रनगर नगरपालिका–४ का प्रेम बुढामगर पनि छन् । गौतम र बुढामगर गिरीका साथी हुन् । फोर्स गाडीको छतमा राखेर सुर्खेतमा बेच्न लैजाँदा गिरीसहित तीनै जना पक्राउ परेका सुर्खेतका एसपी राजेन्द्र भट्टले बताए । पक्राउ परेका तीन जनामाथि थप अनुसन्धान भइरहेको पनि प्रहरीले जनाएको छ ।