कांग्रेस सभापति देउवा र प्रचण्डबीच भेटवार्ता

३० कार्तिक, काठमाडौं । कांग्रेस सभापति शेरबहादुर देउवा र नेकपाका कार्यकारी अध्यक्ष प्रचण्डबीच भेटवार्ता भएको छ । पछिल्लो समय प्रधानमन्त्री केपी शर्मा ओलीसँग तिक्तता बढेपछि आगामी सत्ता समीकरणका विषयमा प्रचण्ड देउवासँग छलफल गर्न बुढानिलकण्ठ पुगेका हुन् ।

भेटमा दुई नेताबीच सत्ता सहकार्यका विषयमा छलफल हुनुका साथै पछिल्लो राजनीतिक अवस्थाका विषयमा छलफल भएको छ । नेकपा फूट नजिक पुगेका बेला कांग्रेस पनि सत्तामा उक्लिने मौका पाउने भएको छ ।

प्रधानमन्त्री ओलीले नेकपा फुटाउने प्रस्ताव गरेसँगै नेकपाको एकता प्रक्रिया लगभग भाडिने अवस्थामा पुगेको छ । यस्तो बेलामा नेकपा फूटेपछि प्रचण्डको नेतृत्वमा बन्ने नयाँ दल र कांग्रेसबीच सहकार्य हुने सम्भावना छ ।

यसअघि देउवासँग सत्ता समीकरणका विषयमा छलफल गर्न प्रधानमन्त्री ओलीले आफ्ना विश्वासपात्र सुवासचन्द्र नेम्वाङलाई पठाएका थिए । त्यतिबेला ओलीले कुरा अघि बढाएपनि नेकपा फुटबाट जोगिएपछि त्यो छलफल त्यत्तिकै सेलाएको थियो ।