प्रधानमन्त्री ओली र माधव नेपालबीच भेटवार्ता

३० कार्तिक, काठमाडौं । सत्तारुढ नेकपाभित्रको आन्तरिक द्वन्द्व बढेका बेला प्रधानमन्त्री केपी शर्मा ओली आन्तरिक परामर्शमा जुटेका छन् । प्रचण्डले लगातार आक्रमण गरिरहेका बेला ओलीले पूर्व एमाले निकट नेताहरुसँग परामर्श गरेका हुन् ।

शनिबार मात्रै राष्ट्रपति विद्या भण्डारीसँग भेटेका प्रधानमन्त्री ओलीले उपाध्यक्ष वामदेव गौतमसाँग परामर्श गरेका छन् । आइतबार वामदेवलगत्तै ओलीले वरिष्ठ नेता माधवकुमार नेपालसँग पनि छलफल गरेका छन् ।

सचिवालय बैठकमा प्रचण्डले पेश गरेको राजनीतिक प्रस्तावमा वामदेवसँगै वरिष्ठ नेता माधवकुमार नेपाल र झलनाथ खनालले पनि समर्थन गरेका छन् । सो प्रस्तावपछि ओली नेतृत्वको सरकार संकटमा परेको छ । प्रचण्डले सैद्धान्तिक रुपमै फरक मतसहितको प्रतिवेदन पेश गरेपछि ओलीलाई अब राजीनामा दिने कि प्रचण्डको कुरा सुन्ने भन्नेमा द्धिविधा छ । बालुवाटारमा यस विषयमा ओलीले उपाध्यक्ष वामदेव गौतम र वरिष्ठ नेता माधव कुमार नेपालसँग छलफल गरेका छन् ।

छलफल सकारात्मक रह्यो वा रहेन् ? भन्ने खुलेको छैन् । यसअघि ओलीले वामदेव गौतमसँग परामर्श गर्दा छलफल सकारात्मक भएको थिएन् । वामदेवले प्रचण्डलाई दोष दिनुको साटो आफ्नो कार्यशैली सुधार्न ओलीलाई आग्रह गरेका थिए ।

प्रचण्डले गौतम, नेपाल, झलनाथ खनाल, नारायणकाजी श्रेष्ठको समर्थनमा सचिवालय बैठकमा राजनीतिक प्रतिवेदन पेश गरेपछि ओली झस्केका छन् ।