ओली-प्रचण्डको घानमा पिल्सिएका माधव नेपाल र वामदेव गौतम

१ मंसिर, काठमाडौं । सत्तारुढ नेकपाभित्रको आन्तरिक किचलोले नेपाली राजनीतिक तरंगित छ । खासगरी नेताहरुको स्वार्थीपन र पदीय लडाईले नेकपाभित्र मात्रै होइन, दुई तिहाई बहमुत पाएको पार्टीको चर्तिकलाले सारा नेपाली ताण्डव हेर्न बाध्य छन् ।

आम नेपालीलाई समेत लज्जित पार्ने नेकपा नेताहरुको जुँगाको लडाई ओली र प्रचण्ड केन्द्रित छ । नेकपाका अध्यक्षद्धय यी दुई नेताहरुको स साना कुरा पनि सञ्चारमाध्यममा हेडलाइन बन्छन भने कुनै एकको मात्रै इगोले सारा पार्टीका नेता कार्यकर्ता चिन्तित छन् ।

ओली र प्रचण्डको जुँगाको लडाईमा सारा नेकपा पार्टी बिरामी बनेको छ । दुई नेताको पदको लडाईले अरु वरिष्ठ भनिएका र आश गरिएका नेताहरु पनि मुसो बिरालोको खेलमा सिमित छन् । खासगरी नेकपाको पछिल्लो आन्तरिक किचलोमा वरिष्ठ नेता माधव नेपाल र उपाध्यक्ष वामदेव गौतम पनि जिम्मेवार छन् ।

तर यी दुई नेताको अस्थिर धारणाका कारण नेकपा पार्टी किचलोमै सिमित हुनुपर्ने बाध्यता छ । कहिले प्रचण्डपट्टि त कहिले ओलीतिर लाग्ने यी नेताहरुको निर्णायक सोच नहुँदा पार्टी कार्यकर्ताबाट पनि आलोचित बन्न पुगेका छन् ।

जसले गर्दा नेकपाको राजनीति दुर्घटनातर्फ अग्रसर भएको छ । ओली र प्रचण्डलाई सत्ताको र पदको मात्रै लोभ भएकाले दुर्घटना हुन दिने वा नदिने भन्ने जिम्मेवारी वरिष्ठ नेता माधव नेपाल र उपाध्यक्ष वामदेव गौतमको काँधमा छ ।

गोट्टी बन्ने कि हस्तक्षेप गर्ने ?

यस्तो विषम परिस्थिती आइलागेका बेला यतिबेला वामदेव गौतम र माधव नेपाललाई पनि यक्ष प्रश्न तेर्सिएको छ । अब सधै ओली र प्रचण्डको गोट्टी बन्ने कि हस्तक्षेप गर्ने ? कहिले ओली पक्ष त कहिले प्रचण्ड पक्षमा लाग्न छाडेर पार्टी र देशलाई चाहिएको के हो ? अब कुन निर्णय ? कसलाई नेतृत्व दिने ? भनेर हस्तक्षेप गर्ने कि खाली हेरेर ताली मात्रै बजाउने ?

यी तमाम प्रश्न नेकपाका कार्यकर्ताको मनमा उठेको छ । हालै प्रचण्डले सचिवालय बैठकमा फरक राजनीतिक प्रस्ताव पेश गरेका छन् । राजनीतिक प्रतिवेदनको नाम दिइएको प्रस्तावमा ओलीको नेतृत्वलाई झुर भनिएको छ ।

अनि ओली कार्यकालमा भएका विभिन्न काण्डलाई सूचीकृत गरेर उठाइएको छ । यसका पछाडी वामदेव र माधव नेपालको हात छ । जुन उनीहरुले स्वीकार गरिसकेका छन् । ओलीका सबै कमजोरी र भ्रष्टाचारको पर्दाफास गरेर प्रचण्डको नेतृत्वमा प्रतिवेदन पेश भएको छ ।

तर विडम्बना प्रचण्डले अहिलेसम्म वामदेव र माधव नेपाललाई भर्याङ बनाएर ओलीसँग सत्ता र पदको बार्गेनिङ मात्रै गरिरहेका छन् । माधव नेपाल र बामदेव गौतमको चाहना र योगदानलाई सम्मान गर्नेभन्दा आफ्नो स्वार्थ लुट्ने प्रचण्ड प्रवृत्तिले पनि समस्या उत्पन्न गरेको छ ।

यस्तो बेला नेकपाको शीर्ष बरियतामा रहेका वामदेव र माधव नेपालले अब निर्णायक हस्तक्षेप गर्न जरुरी छ । सधै यो चर्तिकला हेरेर मात्रै पुग्दैन्, नेतृत्वमा रहेका व्यक्तिहरुले यस्तै कठिन घडीमा कदम र जोखिम उठाउन सक्नुपर्छ । अनि आम नेता, कार्यकर्ता र जनतामा आशाको सञ्चार गर्नुपर्छ । होइन भने नेकपा दुई तिहाईको बहुमत गुमाएर नेपालमा काम नलाग्ने पार्टीमा परिणत हुन बेर लाग्दैन् ।