सुपथ मूल्य पसल माघ महिनासम्मै चल्ने

८ मंसिर, काठमाडौं । खाद्य व्यवस्था तथा व्यापार कम्पनीले सञ्चालनमा ल्याएको चाडपर्व लक्षित सुपथ मूल्य पसललाई निरन्तरता दिएको छ । कोरोनाको असर बाँकी नै रहेको र दशैं, तिहार तथा छठमा लक्ष्यअनुसारको बिक्री नभएपछि माघी पर्वसम्म सहुलियत पसल सञ्चालन गर्ने निर्णय गरिएको खाद्य व्यवस्था तथा व्यापार कम्पनीले जनाएको छ ।

मंसिर सात गतेसम्म संस्थानले १० हजार २७ क्वीन्टल खाद्य बस्तु बिक्री गरेको जनाएको छ । सो अवधिमा उपभोक्तालाई दिइएको छुट बापतको रकम ८७ लाख भएको सूचना अधिकारी न्यौपानेले बताइन् । हालसम्मको कुल कारोबार रकम भने केही दिनमा आउने कम्पनीले जनाएको छ ।

कम्पनीले चामल, तिते फापर, कर्णालीको सिमी, इन्डक्सन चुल्हो, डिडिसीको घ्यू, साल्ट ट्रेड्रिङको पिठो लगायतका चीज बिक्री गर्दै आएको छ । खाद्य व्यवस्था तथा व्यापार कम्पनीको संयोजनमा दूग्ध विकास संस्थान र साल्टट्रेडिङसँग मिलेर देशभर ४६ भन्दा धेरै सुपथ मूल्य पसल असोज १५ गतेदेखि सञ्चालनमा ल्याइएको थियो ।