प्रहरीमा उजुरी दिन गएकी दीपक मनाङेकी श्रीमति पक्राउ

१० मंसिर, काठमाडौं । गण्डकी प्रदेशका सांसद राजीव गुरुङ उर्फ दीपक मनाङेकी श्रीमती पक्राउ परेकी छिन् । मनाङे अहिले सांसद भएपनि पहिले भने गुण्डा नाइकेका रुपमा परिचित थिए । उनकी श्रीमति दिक्छेन गुरुङलाई प्रहरीले पक्राउ गरेको हो ।

जिल्ला प्रहरी कार्यालय, मकवानपुरमा उजुरी दिन गएका बेला उनलाई पक्राउ गरिएको हो ।

मकवानपुरका एसपी सुशील सिंह राठौरका अनुसार जिल्ला प्रहरी कार्यालय, कास्कीले पठाएको फरार सूचीको पत्र अनुसार उनलाई पक्राउ गरिएको हो । कास्की जिल्लाको पोखराबाट बहुमुल्य धातुको मुर्ति चोरी गरेको घटनामा उनी फरार सूचीमा थिइन् ।

माइतीमै बस्दै आएकी उनलाई कास्की जिल्ला अदालत पठाएको प्रहरीले बताएको छ । उनी लामो समयदेखि हेटौंडा उपमहानगरपालिका–१२ मा रहेको माइतीमा बस्दै आएकी थिइन् । मुर्ति चोरीको काम पनि मनाङेले नै गराएको हुन सक्ने अनुमान गरिएको छ ।