आज साँझ हर्षवर्धन र प्रधानमन्त्रीबीच शिष्टाचार भेटवार्ता हुने

११ मंसिर, काठमाडौं । भारतीय विदेश सचिव हर्षवर्धन श्रृंगलाले आज प्रधानमन्त्री केपी ओली र राष्ट्रपति विद्यादेवी भण्डारीसँग भेटवार्ता गर्ने भएका छन । विदेश सचिव श्रृंगलाले साँझ ५ बजे प्रधानमन्त्री ओलीसँग शिष्टाचार भेटवार्ता गर्ने तय भएको छ ।

बालुवाटारको भेटपछि उनी शितल निवास जानेछन् र राष्ट्रपति भण्डारीसँग शिष्टाचार भेटवार्ता गर्ने कार्यक्रम रहेको छ । आज दुई दिने नेपाल भ्रमणमा आएका काठमाडौं आएका उनी अहिले दुई देशको प्रतिनिधिमण्डल स्तरीय वार्तामा छन् ।

होटल याक एण्ड यतीमा जारी वार्ता सकिएपछि उनले परराष्ट्रमन्त्री प्रदीप ज्ञवालीलाई भेट्नेछन् । त्यसक्रममा उनले दुई हजार भाइल रेमडिसिभिर हस्तान्तरण गर्ने कार्यक्रम छ ।

उनी भोलि गोरखा र मनाङ जानेछन् । गोरखामा भारतीय सहयोगमा बनिरहेको घरहरुको अवलोकन गर्नुका साथै तीन विद्यालयको उद्घाटन गर्नेछन् । मनाङमा पनि भारतीय सहयोगमा बनेको गुम्बा उद्घाटन गर्ने कार्यक्रम छ । उनी भोलि नै भारत फर्किनेछन्