युवती बिरामी भएपछि झारफुक : भूत भगाउने भन्दै धर्मगुरुले बलात्कार गरे !

११ मंसिर, सिरहा । सिरहाको लहानमा भूत भगाउने भन्दै मूस्लिम धर्मगुरुले युवतीमाथि बलात्कार गरेको पाइएको छ । सिरहाको मिर्चैया नगरपालिका–१० महेशपुर पुखर्यौली घर भई लहानमा डेरा गरी बस्दै आएका ३५ वर्षीय मोहम्मद अली हसनले आफूकहाँ झारफुक गर्न आएकी युवतीमाथि बलात्कार गरेको खुलेको हो ।

लहानकी २३ वर्षीया युवतीमाथि उनले बलात्कार गरेका हुन् । मंगलबार साँझ लहान–७ की २३ वर्षीया मुस्लिम युवती बिरामी भएपछि धर्मगुरु हसनको डेरामा पुगेका थिए । मौलाना हसनले झारफुकको काम गर्दै नाम कमाएका थिए । तर उनले युवतीमाथि बलात्कार गरेर आफ्नो नाम कलंकित पारेका छन् ।

झारफुक गर्ने नाममा कोठा थुनेर उनले युवतीमाथि बलात्कार गरेका हुन् । बलात्कार गरेपछि मौलानाले घटना सार्वजनिक नगर्न आफूलाई भुतको डर देखाएको समेत खुलेको छ ।

बलात्कारपछि रक्तस्राव भएपछि युवती बलात्कृत भएको खुलेको हो । धर्मगुरुको डरले उनले बलात्कार भएको घटना बताएकी थिइनन् । तर रक्तस्राव नरोकिएपछि घर परिवारमा भन्दा पोल खुलेको प्रहरीले जनाएको छ ।

बलात्कारको जाहेरी दिएपछि प्रहरीले उनलाई डेराबाटै पक्राउ गरी जबर्जस्ती करणी कसूरमा मुद्दा दर्ता गरेको छ।