माओवादी केन्द्रको अध्यक्षमा कर्णजीत बुढाथोकी निर्वाचित

१२ मंसिर, काठमाडाैं । नेपाल कम्युनिस्ट पार्टी (माओवादी केन्द्र)को हालै सम्पन्न केन्द्रीय समितिले कर्णजीत बुढाथोकीलाई अध्यक्षसहित पदाधिकारी र केन्द्रीय समिति निर्वाचित गर्दै सम्पन्न भएको छ । केन्द्रीय समिति बैठकले पार्टीको आगामी कार्यदिशा र कार्यक्रम पनि ठोस गरेको छ ।

पुनर्गठित नेकपा ‘माओवादी केन्द्र’को नयाँ अध्यक्षमा कर्णजीत बुढाथोकी चयन भएको छ। केन्द्रीय समिति बैठकले सोमबार नयाँ नेतृत्व चयन गरेको हो। कार्तिक ११ गते माओवादी केन्द्रका अध्यक्ष गोपाल किरातीले पार्टी अध्यक्षबाट राजीनामा दिएपछि नयाँ नेतृत्व चयन गरिएको हो।

पुष्पकमल दाहाल ‘प्रचण्ड’ नेतृत्वको तत्कालिन नेकपा ‘माओवादी केन्द्र’ एमालेसँग मिल्न गएपछि किराँतीले पार्टी पुर्नगठन गरेका थिए।एमालेसँगको एकतामा विमति जनाउँदै नेकपा माओवादी केन्द्र पुनर्गठन गरेका किरातीले स्वास्थ्यका कारण हालै अध्यक्षको जिम्मेवारी छोडेको भनिएको थियो।

अध्यक्षमा निर्वाचित बुढाथोकीको परिवारबाट माओवादी जनयुद्धमा दुई जना शहीद भएका थिए। उनकी जीवन संगिनी उपाल लामा २०५९ मंसिर ३ गते हुम्लाको केरमिको जनयुद्धकालीन घटनामा शहादत प्राप्त गरेकी थिइन्। त्यस्तै उनको दाई धर्मजीत बुढाथोकी २०५८ साल जेष्ठ २० गते बाँकेको कुशुममा भएको घटनामा शहादत प्राप्त गरेका थिए ।